Abuztuko aipagarrienak
2025-09-08
2025eko abuztuan zehar herritarrek Behatokira bidalitako hizkuntza eskubideen urraketen lagin bat, zoriontzeak eta lorpenak jaso ditugu ondorengo zerrendan. Zuk ere intzidentzia bat bidali nahi badiguzu, erabili Euskararen Telefonoa.
URRAKETAK
» Santurtziko Udalak erdaraz bidali zien herriko ostalariei informazio-gutuna.
» Txik Txak autobusek beraien afixak frantses hutsean jarri zituzten.
» Iruñeko Buztintxuri auzoko osasun etxean informazio gehiena gaztelaniaz dago.
» Durango eta Berangoko Decathlon dendetako errotulazio guztia gaztelaniaz dago.
» Gasteizko Yelmo zinemek ez dituzte Zineuskadik euskaratzen dituen filmak euskaraz eskaintzen.
» Tafallako tren geltokiko bozgorailuetatik informazioa gaztelania hutsean zabaltzen da.
» Getariako hondartzako bozgorailuetatik gaztelaniazko mezua lehenetsi zen.
» Costco dendetako errotulu guztiak gaztelaniaz daude.
» Arrauneko Eusko Label eta Euskotren Ligaren instagram kontutik mezu gehienak erdaraz zabaltzen dira.
» Iruñeko Udaleko Segurtasun eta Bizikidetza arlotik euskarazko idatziei gaztelania hutsean erantzun zaie.
» Nafarroako Aldizkari Ofizialeko estilo liburua ez dago euskaraz. Hainbat dokumentu eta eredu ere gaztelania hutsean daude.
» DGTren webgunean ezin dira isunak euskaraz ordaindu euskarazko bertsioak akatsa duelako.
ZORIONTZEAK
» Orioko Boga-Boga jatetxeari eta Ktxo pizzeriari, euskaraz artatzeagatik.
» Barakaldoko Santiago Nieto klinika podologikoari, arreta eta webgunea euskaraz eskaintzeagatik.
» Iruñeko Adara ileapaindegiari, euskaraz artatzeagatik.
» Kneecap musika talde irlandarrari, Facebooken iragarkiak euskaraz jartzeagatik.
» Bilboko Lepanto tabernari, arreta euskaraz ziurtatzeagatik.
» Barakaldoko Fysyos Garnacho Fisioterapia klinikari, zerbitzua euskaraz eskaini eta webgunea ere euskaraz izateagatik.
» Nafarroako Udal eta Kontzejuen Federazioari, lehen aldiz hautetsiei begirako berdintasunari buruzko online ikastaroak euskaraz ere eskaintzeagatik.
LORPENAK
» Gasteizko aireportua sustatzeko VIA sozietateak euskaraz ere argitaratuko ditu kontratazioen baldintzak eta euskaraz idatzitako eskaintzak onartuko ditu (irizpide diskriminatzaileak aldatu ditu).
» Hondarribiako Errekabea auzoko igerilekuetan kartelak euskaraz ere ezarri dituzte.
