Apirileko aipagarrienak

URRAKETAK

» Bordeleko Akademiak Baxoan matematikako azterketak euskaraz pasatzea ukatu du.

» Gasteizko Udalak deitutako lan deialdi publiko batean, euskarazko ikas-material nahikorik ez zegoela argudiatuta, hautagaiei azterketa gaztelaniaz egiteko gonbitea egin zaie.

» Osasunbidearen San Martin osasun etxeko arreta puntuan ez zegoela euskaraz artatzeko inor erantzun zioten herritar bati.

» Irungo Ertzaintzaren komisaldegian euskarazko arreta eskatu arren, une horretan ez zegoela euskaraz artatzeko gai zen inor erantzun diote herritar bati.

» LIDL supermerkatu kateak auto-ordainketa makinak ezarri ditu hainbat hizkuntzatan eskuragarri; euskaraz ez.

» Gipuzkoako Foru Aldundiko online laguntza zerbitzuan kontsulta euskaraz egin arren, erantzuna gaztelaniaz heldu zaio herritar bati.

» Osakidetzan prozesu onkologikoko laguntza psikologikoa euskaraz nahi zuela adierazi arren, zerbitzua gaztelaniaz soilik bermatzen diotela salatu du herritar batek.

» Nafarroako Artxibo Nagusian dauden gida birtualekin ezin da euskara erabili.

» Merkataritza eta ostalaritzako hainbat enpresatan euskaraz egitean erantzun txarrak ematen jarraitu dute.

» Donostiako San Martin Merkatuko Martintxo aldizkarian euskarak gero eta tarte gutxiago duela salatu dute.

» Akitania Berria, Euskadi, Nafarroa Euroeskualdeak prentsan zabaldutako lan-eskaintza gaztelania hutsean ezarri duela salatu dute.

» Nafarroako Ostalaritza eta Turismo Elkarteak komunikazio jarduera gaztelania hutsean egiten duela salatu dute.

» Trapagarango Udaleko Kultura eta Ogasuneko ataletan euskaraz aritzerakoan “erdaraz mesedez” erantzun diotela salatu du herritar batek.

» Alaves futbol taldeak zaletuei zuzendutako emaila gaztelania hutsean helarazi du.

» Inpost bidalketa enpresaren paketeak jasotzeko gailuetan euskara hautatzeko aukerarik ez dagoela salatu dute.

» Bizkaibusen kanpaina batetan euskararen erabilera traketsa salatu zuten.

» Iberdrolatik jasotako deian ezin izan du euskara erabili herritar batek.

» Nafarroako Kontuen Ganberaren euskarazko webgunea ezin da osotasunean euskaraz kontsultatu.

» Mutualian osasun laguntzako partea ez dutela euskaraz erantzun diote herritar bati.

» Ocaso aseguru etxeak ez du euskarazko dokumentazioa bermatzen.

» Hainbat webgune ezin direla euskaraz egoki kontsultatu salatu dute herritar ezberdinek.

» Kiabi edo Decathlon bezalako enpresen euskararekiko jarrerak salatu dituzte.

 

ZORIONTZEAK

» Cirque du Soleil zirkuari, Barakaldon izango direla iragartzen duen kartela Facebooken euskaraz ezartzeagatik.

» Doneztebeko Ekaitza tabernari, bezeroak euskaraz artatzeko egiten duten ahaleginagatik.

» Iruñeko La Kontxa arraindegiari, afixak euskaraz ere ezarri eta arreta euskaraz eskaintzeagatik.

» Prink Iberia enpresaren Barakaldoko dendari, euskarazko arreta emateagatik.

 

LORPENAK

» Osatek-ek burmuineko gaitz larrien aurrean probak euskaraz egin ahal izateko sistemaren aurrekontua onartu du, ekainetik aurrera euskaraz ere erabilgarri egon dadin.

» Bizkaian Metal-eraikuntzetako Lanbide Heziketako zikloan D ereduko eskaintza izatea lortu da (Zornotza, Barakaldo eta Zalla D ereduan, Somorrostron B ereduan)

» Nafarroako Gobernuak Adinekoen Programa Globalaren diru-laguntza deialdiko agiriak euskaraz ere ezarri ditu.

» Durangoko Udalak neurriak hartu ditu obra esleipendun enpresa batek hizkuntza klausulak bete ditzan.