Ekaineko aipagarrienak

KEXAK

» Euskal Hirigune Elkargoko Euskal Herri-Aturriko Mugikortasunen sindikatutik haurren garraiorako informazio-gutuna frantses hutsean igorri dute ikastoletara.

» Hainbat merkataritza-gunetan eta bertan kokatutako enpresatan ez da euskarazko errotulaziorik jartzen, edo bestelako zerbitzurik euskaraz eskaintzen (Ñam jatetxeetan, Decathlon saltokietan…) ere.

» Iruñeko Udaleko euskarazko webgunean informazio gutxiago jartzen jarraitzen dute, eta kale izendegi batzuk gaztelania hutsean agertzen dira oraindik.

» Gurutzetako ospitalean aldi baterako errotulazioa gaztelaniaz jartzen dute behin eta berriro.

» Jai eta udako egitarau askotan euskarazko eskaintza gutxiago izaten da.

» Nafarroako Lan Ikuskaritzak ez ditu euskarazko dokumentuak onartzen (nominak etab.).

» Zurich aseguru-etxeak ez ditu euskarazko polizak eta dokumentazioa eskaintzen.

» Ertzaintzaren aldetik ez dira herritarren hizkuntza-eskubideak bermatzen: euskarazko arreta ukatzea, herritarrak euskaraz egin arren salaketak gaztelaniaz tramitatzea, jakinarazpenak gaztelania hutsean bidaltzea…

» Orona enpresak berriz gaztelania hutsezko errotulazioak jarri ditu Iruñerrian.

» Nafarroako Erriberako EDER Partzuergoak eta Osasunbideak gazteentzako udako jaietarako kanpaina gaztelania hutsean egin dute.

» DGTren jakinarazpenak eta mezuak gaztelania hutsean heltzen dira.

» Lanbideren webgunean oraindik ezin da dena euskaraz kontsultatu.

 

ZORIONTZEAK

» Bastidako San Felices okindegiari, euskaraz artatzeagatik (karteldegia euskaraz ere jartzeko eskatu zaie).

» Bakioko La Cantine jatetxeari, euskarazko karta edukitzeagatik.

» Gipuzkoako Il Capo janaria etxera eramateko enpresari, bere eskaintza euskaraz zabaltzen duelako eta webgunea euskaraz ere duelako.

 

LORPENAK

» Trapagarango Udalak ‘Kirolaren gida’ liburuxkak elebitan argitaratuko ditu, euskara ere txertatuaz.

» Osakidetzako hainbat ohar eta aldi baterako kartel euskaraz jarri dira.

» Zizur Nagusiko Udalak seinaletika euskaraz ere jarri du.

» Zarauzko osasun etxean emagin euskalduna eskaini ahal izateko neurriak hartu dituzte.

» Gasteizko Hiri Garraioa enpresak kanpo jakinarazpen, ohar eta errotuluak berriztuko ditu euskaldunen hizkuntza-eskubideak kontuan hartzeko.

» Nafarroako Gazte Txartela eta gutuna euskaraz helarazteko akatsak zuzendu dira.

» Bilboko Zazpi Kaleetako osasun etxean euskaraz dakiten bi fakultatibo berri kontratatu dira.