Osakidetzan euskaraz lan egin eta euskara erabiltzeko eskubidearen kontra ematen diren erasoak salatu dituzte OEEk eta Behatokiak

Ez da lehen aldia Osakidetzan pazienteen hizkuntza eskubideak hobe bermatzeko asmoz, euskaraz lan egitea erabakitzen duten profesionalak antzeko egoerak pairatu dituztela.

Oraingo honetan ere, profesional batek Osakidetzarekin harremana euskaraz eskatua duen herritar bat alergologiara bideratzeko eskaera euskaraz idazteagatik beste profesional batek alta txostena ingelesez idatziko zuela esanez oldartu zaio. Izan ere, ESI honen kasuan, euskaraz lan egiteko eskubidea eta, beraz, pazientearen txostena euskaraz idazteko eskubidea kode etikoan zein harrera protokoloetan jasoa izan arren, Osakidetzako sisteman eta profesionalen artean oraindik ez da behar bezala bermatzen euskara erabili ahal izatea.

Gogoratu behar dugu duela hilabete batzuk ere antzeko kasua gertatu zela euskaraz idatzitako mediku txostenean, beste mediku batek txostena gaztelaniaz idazteko eskatzen zuen oharra idatzi zuenean.

Horrelako egoerak ekidin eta euskaraz lan egiten duten profesionalek beraien lana oztopatua izan ez dadin, eta euskaraz lan egiteagatik jazarpen kasuak ekiditeko, beharrezkoa iruditzen zaizkigu ondorengoak:

1. ESI guztietako kode etiko eta harrera protokoloetan euskaraz ahoz zein idatziz lan egiteko eskubidea behar bezala jasotzea.
2. Eskubide hori behar bezala bermatzeko mekanismo guztiak martxan jartzea.
3. Euskara erabiltzen duten profesionalak jazarpen zein bestelako egoeretatik behar bezala babestea eta ez betetzeen aurrean neurri irmoak hartzea, euskara erabiltzearen kontrako erasoak salatuaz.
4. Osakidetzako profesional guztiak euskarazko arreta bermatu dadin euskaraz lan egiteak duen garrantziaz formatu eta kontzientziatzea, profesionalek euskara ikasi eta erabiltzeko eskuragarri dituzten tresna guztiak indartuz.

Egoera hauek zein herritar eta profesionalen hizkuntza eskubideen defentsan neurriak eskatzeko, Osakidetzako arduradun publikoekin bilduko gara.